استعفیٰ ہی سب کچھ نہیں؛ بی جے پی کو نیٹ بحران پر جوابدہ ہونا پڑے گا. ایس ڈی پی ائی

سوشیل ڈیموکریٹک پارٹی آف انڈیا ملک بھر کے اُن طلبہ اور نوجوانوں کو مبارکباد پیش کرتی ہے جن کی پُرعزم، منظم اور پُرامن جدوجہد کے نتیجے میں مرکزی وزیرِ تعلیم دھرمیندر پردھان کو استعفیٰ دینا پڑا۔ اُن کی ثابت قدم جدوجہد نے بی جے پی حکومت کے غرور اور آمرانہ طرزِ عمل کو شکست دیتے ہوئے ایک بار پھر جمہوریت اور عوامی طاقت کی پائیدار قوت کو ثابت کر دیا ہے۔ وزیر کا استعفیٰ اُن سنگین ناکامیوں کی ذمہ داری قبول کرنے کا ثبوت ہے جنہوں نے کروڑوں طلبہ کے خواب چکنا چور کر دیے۔ یہ بھی ثابت کرتا ہے کہ اقتدار میں بیٹھے لوگ خواہ کتنے ہی طاقتور کیوں نہ ہوں، عوام کی منظم، مسلسل اور جمہوری جدوجہد انہیں جوابدہ بنانے کی صلاحیت رکھتی ہے۔

صرف ایک وزیر کی قربانی دے کر بی جے پی اس ذمہ داری سے نہیں بچ سکتی۔ نیٹ کا بحران انتظامی ناکامی، ادارہ جاتی زوال اور طلبہ کے خدشات کو برسوں تک مسلسل نظر انداز کرنے والی مرکزی حکومت کی پالیسیوں کا نتیجہ ہے۔ طلبہ کو انصاف فراہم کیا جانا چاہیے۔ خودکشی کرنے والے طلبہ کے خاندانوں کو مناسب معاوضہ دیا جانا چاہیے۔ مظاہرین کے خلاف درج تمام مقدمات واپس لیے جانے چاہییں۔ نیٹ اسکینڈل کے ذمہ دار تمام افراد کو قانون کے کٹہرے میں لایا جانا چاہیے۔ ساتھ ہی حکومت کو ایس ڈی پی آئی کے اس دیرینہ مطالبے کو بھی تسلیم کرنا چاہیے کہ نیٹ اور اس نوعیت کے دیگر امتحانی نظام کو ختم کر کے عوامی امتحانی نظام میں جامع اصلاحات نافذ کی جائیں۔

ایم۔ کے۔ فیضی
قومی صدر
سوشیل ڈیموکریٹک پارٹی آف انڈیا